ဘယ်သူ့ဘယ်သူကိုမှ နစ်နာလိုစိတ် မရှိပါဘူးလို့ပြောလာတဲ့ ‘မျိုးဖျက်ပိုး’ ကဗျာရေးသားသူ ကဗျာဆရာကြီး ဆန်းလွင် (မြန်မာစာ) နှင့် တွေ့ဆုံမေးမြန်းခြင်း

ရုပ်သံမီဒီယာတွေမှာ Transgender အမျိုးသမီးတွေပုံစံနဲ့ အဖော်အချွတ် ဟာသသရုပ်ဆောင်မှုတွေဟာ လိင်တူချစ်သူတွေ (LGBT) တွေကို စော်ကားတဲ့လုပ်ရပ်ဖြစ်တယ်လို့ လိင်တူချစ်သူအသိုင်းအဝိုင်းမှာ ဝေဖန်မှုတွေ ရှိပါတယ်။

မကြာသေးခင် ရက်ပိုင်းအတွင်းကလည်း ကဗျာဆရာကြီး ဆန်းလွင်(မြန်မာစာ)ရဲ့ “ မျိုးဖျက်ပိုး” ကဗျာကို တေးဆို-အောင်သစ် (ပေါ်ပေါ်ပေါ်)က “ဖော်ကာချွတ်ကာ မျိုးဖျက်ပိုး” သီချင်းအမည်နဲ့ သီဆိုထားတဲ့ သီချင်းကို ဒါရိုက်တာ ဂီတမှူး ဦးပေါသျှံက သရုပ်ဆောင် လူရွှင်တော်များဖြစ်တဲ့ ထင်ပေါ်၊ ကောင်းကျော်၊ အောင်သစ်၊ ချာလီ၊ ရွှေငါးတို့ကို အမျိုးသမီးများအသွင် ဝတ်ဆင်စေကာ မန္တလေးမြို့ စျေးချိုမှာ ရိုက်ကူးခဲ့ကြပါတယ်။

အဆိုပါ ရိုက်ကူးမှုဟာ LGBT များကို ထိခိုက်စေတယ်လို့လည်း ဆိုရှယ်လူမှုကွန်ရက်ပေါ်မှာ ဝေဖန်မှု များပြားလာခဲ့ပါတယ်။ ဒါကြောင့် အဆိုပါတေးသီချင်းအား ရေးသားသူ ကဗျာဆရာကြီး ဆန်းလွင် (မြန်မာစာ)ကို အဆိုပါအခြင်းအရာနဲ့ပတ်သက် ပြီး မေးမြန်းတင်ဆက်ပေးလိုက်ပါတယ်။

လူမှုကွန်ရက်ပေါ်မှာ ပျံ့နှံနေတဲ့ မိန်းမလျာလို ဝတ်စားသရုပ်ဆောင်နေတဲ့ ရိုက်ကွင်းကြောင့် ဝေဖန်မှုတွေ ရှိနေပါတယ်။ ဒါကို ဆရာ့အနေနဲ့ ဘယ်လိုပြောချင်ပါသလဲ။

အဲဒီရိုက်ကွင်းက ဂယက်ထသွားတာပေါ့ဗျာ။ ကဗျာရဲ့ရည်ရွယ်ချက်က မြန်မာအမျိုးသမီးလေးတွေ အခုခေတ်မှာ အဝတ်အစား လော်လီတာရှိကြတာကို မြန်မာ့ယဉ်ကျေးမှုအရ ပြန်လည်ထိန်းသိမ်းတဲ့အနေနဲ့ ကျွန်တော်က ဒီကဗျာလေးကို ရေးလိုက်တာ။ အဲလိုရေးလိုက်တာကို ဖေ့ဘုတ်မှာ ကြည့်သူ တစ်သောင်းကျော် ရှိသွားတယ်။ မန္တလေးက အဆိုတော် ပေါ်ပေါ့ပေါ်က ခွင့်တောင်းတာပေါ့။ ဒီကဗျာလေးကို သီဆိုချင်တယ်ဆိုလို့ ခွင့်ပြုလိုက်တယ်။ မြန်မာမိန်းကလေးတွေ မြန်မာ့ယဉ်ကျေးမှုကို ထိန်းသိမ်းတဲ့ကဗျာလို့ ညီလေးတို့အနေနဲ့ အစ်ကိုရဲ့ကဗျာလည်း မပျက်စီးအောင် ညီလေးတို့လည်း အဆင်ပြေအောင် ရိုက်ချင်လည်း ရိုက်ပါ။ ဒီဟာ ရိုက်တဲ့အတွက်ကြောင့် ဘယ်သူတစ်ဦးတစ်ယောက်ကိုမှ မနစ်နာပါစေနဲ့ ကျွန်တော်က အဲလိုပြောလိုက်တာ။ ဟုတ်ကဲ့ပါ ဆရာ၊ ဒီကဗျာသဘောတရားအရ အမျိုးသမီးအစစ်တွေနဲ့ ရိုက်လို့ မရဘူးတဲ့။ ရိုက်ကူးရေးနဲ့ပတ်သက်ပြီး အစ်ကိုတော့ နားမလည်ဘူး၊ ညီလေးတို့ဘာသာ ဒါရိုက်တာနဲ့ တိုင်ပင်ရိုက်ကြပါလို့ ပြောလိုက်တယ်။

လက်ရှိ ရိုက်ကွင်းမှာ မိန်းမလျာတွေလို သရုပ်ပျက် သရုပ်ဆောင်မှုတွေအပေါ် ဘယ်လိုပြောချင်ပါသလဲ။ ရိုက်ကွင်းရဲ့ အဓိကဆိုလိုရင်းကိုရော သိလိုပါတယ်။

မိန်းခလေးအစစ်မရတော့ အမျိုးသားတွေကို အမျိုးသမီးအဝတ်နဲ့ဝတ်ပြီး ရိုက်ရမယ်တဲ့။ ရန်ကုန်က ကိုကောင်းကျော်တို့အဖွဲ့က မိန်းခလေးဝတ်စုံတွေဝတ်ပြီး ဟာသလေးတွေနဲ့ စျေးချိုထဲမှာ သရုပ်ဆောင်တာပေါ့။ အပြင်က ပရိသတ်တွေအနေနဲ့က အတိုအပြတ် ဝတ်တာတွေကြည့်ပြီး မိန်းမလျာတွေရဲ့ သဘောသဘာဝကို ဖော်ကျုးထားတယ်လို့ မြင်သွားတာ။ အမှန်က အဲလို မဟုတ်ဘူးဗျ။ မြန်မာအမျိုးသမီးတွေ ယဉ်ယဉ်ကျေးကျေးဝတ်စားပြီး တင့်တင့်တယ်တယ် နေတာက ဒီလိုဖော်ချွတ်နေတာထက် လောကကြီးမှာ ပိုတင့်တယ်တယ်ဆိုတဲ့အကြောင်းကို ယှဉ်ပြီးရိုက်သွားမှာကိုး။ ရိုက်ကွင်းကို မြင်သွားတဲ့သူအမြင်က မိန်းခလေးလိုဝတ် ဖော်ချွတ်ပုံစံကို မိန်းမလျာတွေကို ကိုယ်စားပြု ရိုက်သွားပါတယ်ဆိုပြီး လူမှုကွန်ရက်က အဲလို ပြန့်သွားတာပေါ့ဗျာ။ အမှန်က အဲလို မဟုတ်ဘူး။ မိန်းမလျာတွေအကြောင်း ပါလည်း မပါဘူး။ ပြောတာလည်း မဟုတ်ဘူး။ ကဗျာစာသားအနေနဲ့ကလည်း မိန်းမလျာတွေအကြောင်း ရေးတာလည်း မဟုတ်ဘူး။ သူတို့က အထင်လွဲပြီးတော့ လူမှုကွန်ရက်မှာ ပြောကြဆိုကြတာပေါ့ဗျာ။ ကျွန်တော်တို့က ဘယ်သူ့ဘယ်သူကိုမှ နစ်နာလိုစိတ် မရှိပါဘူး။ အမျိုးသမီးတွေနဲ့ ရိုက်လို့မရလို့သာ အမျိုးသားသရုပ်ဆောင်တွေနဲ့ မိန်းမလိုဝတ် လူကြားသူကြားထဲ ရိုက်ရတာပါဆိုတဲ့အကြောင်း ရှင်းပြလိုပါတယ်။

ဒါဆို ဆရာအနေနဲ့ရော လိင်တူချစ်သူ LGBT တွေအပေါ် ဘယ်လိုအမြင်ရှိလဲ။

ဗုဒ္စတရားတော်နဲ့ပြောရမယ်ဆိုရင် ကံကံရဲ့အကျိုးလေးတွေဖြစ်လာတာ အပိုင်းတစ်ပိုင်းပေါ့။ နောက်တစ်ချက်က ကျန်းမာရေး ရှုထောင့်အနေနဲ့ ဟိုမုန်းဓာတ်ဆိုတာ ရှိတယ်လေ။ ဟိုမုန်းဓာတ် အနည်းအများပေါ်မူတည်ပြီးတော့ ဒီစိတ်က ပြောင်းလဲသွားတာ ရှိတယ်။ သူတို့အသွေးအသားကလည်း သူ့တို့ဘက်ကကြည့်ရင် မှန်ချင်လည်း မှန်နေလိမ့်မယ်။ အပြစ်လည်း မမြင်တတ်ဘူး။ သဘာဝတရားအရ ဖြစ်နေတာလေးတွေ နားလည်ပါတယ်လို့ ပြောချင်ပါတယ်။ သူ့ဘဝနဲ့သူ ကိုယ့်ဘဝနဲ့ကိုယ် ရှင်သန်နေကြတာ။ နားလည်ပါတယ်။

အခုလို ဖြေကြားပေးတာ ကျေးဇူးတင်ပါတယ်။

လဲ့လဲ့
တင်ဆက်သည်

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.