နယူးဇီလန်မှာ ကြိုးမဲ့အင်တာနက် လုပ်ငန်းထူထောင်ထားတဲ့ ကိုကျော်ဇင်လင်းနှင့် တွေ့ဆုံမေးမြန်းခြင်း

ယခုအမှတ်စဉ်အတွက် ကာလာရိန်းဘိုး စာဖတ်ပရိသတ်ကို နိုင်ငံတကာမှာ အောင်မြင်နေတဲ့ မြန်မာလူမျိုး လုပ်ငန်းရှင် Gay (လိင်တူချစ်သူ အမျိုးသား) တစ်ဦးနဲ့ မိတ်ဆက်ပေးလိုပါတယ်။

သူကတော့ နယူးဇီလန်နိုင်ငံမှာ ထင်ရှားတဲ့ အင်တာနက် ဆက်သွယ်ရေး ၀န်ဆောင်မှုလုပ်ငန်း Wireless Nation ကို တည်ထောင်သူ ကိုကျော်ဇင်လင်း ဖြစ်ပါတယ်။ ၂၀၀၅ ခုနှစ်မှာ သူ စတင်တည်ထောင်ခဲ့တဲ့ Wireless Nation အင်တာနက် ကုမ္ဗဏီဟာ နယူးဇီလန်မှာ အအောင်မြင်ဆုံး ကြိုးမဲ့ဆက်သွယ်ရေး ၀န်ဆောင်မှု လုပ်ငန်း Internet Service Provider တစ်ခု ဖြစ်လာပါတယ်။ လက်ရှိ နယူးဇီလန် ကျွန်းမကြီးနဲ့ ပစိဖိတ်သမုဒရာထဲက အလွန်ဝေးလံတဲ့ ကျွန်းငယ်လေးတွေအပါအဝင် တစ်နိုင်ငံလုံး လွှမ်းခြုံတဲ့ ကြိုးမဲ့အင်တာနက် ၀န်ဆောင်မှုပေးနိုင်တဲ့ တစ်ခုတည်းသော ကုမ္ဗဏီ ဖြစ်ပါတယ်။

၎င်းအပြင် ကိုကျော်ဇင်လင်းဟာ ၂၀၁၂ ခုနှစ် Mr Gay World ဆုရှင်ရဲ့ခင်ပွန်းလည်း ဖြစ်ပါတယ်။ ကိုကျော်ဇင်လင်းရဲ့ အမျိုးသား မစ္စတာ Andreas Derleth ဟာ ၂၀၁၂ ခုနှစ်က တောင်အာဖရိကနိုင်ငံမှာ ပြုလုပ်ခဲ့တဲ့ Mr Gay World 2012 ပြိုင်ပွဲမှာ နယူးဇီလန်နိုင်ငံ ကိုယ်စားပြု ယှဉ်ပြိုင်ခဲ့ပြီး Mr Gay World title ကို ရရှိခဲ့လို့ သူတို့နှစ်ဦးလုံးကို ပိုပြီး လူသိများခဲ့ပါတယ်။

အခုလို စီးပွားရေးမှာကော၊ အချစ်ရေးမှာပါ အောင်မြင်နေတဲ့ မြန်မာလူမျိုး လိင်တူချစ်သူ တစ်ယောက်အနေနဲ့ မြန်မာနိုင်ငံက လိင်တူချစ်သူတွေအတွက် ဘယ်လို သတင်းစကားတွေများ ပေးဖို့ ရှိနေပါသလဲ။ ၀ါရှင်တန် ဒီစီမြို့မှာ နေထိုင်တဲ့ ကိုနေရောင်လင်းခန့်က အီးမေးလ်နဲ့ ဆက်သွယ်မေးမြန်းထားပါတယ်။ ကိုကျော်ဇင်လင်းရဲ့ ဖြေကြားချက်တွေကို မြန်မာလို ဘာသာပြန် ဖော်ပြလိုက်ပါတယ်။

အစ်ကို့ရဲ့ နာမည်၊ လက်ရှိနေထိုင်တဲ့ နိုင်ငံနဲ့အလုပ်အကိုင်ကို ပြောပြပေးပါ။

ကျွန်တော့် နာမည် ကျော်ဇင်လင်း ပါ။ လက်ရှိ နယူးဇီလန်နိုင်ငံ အော့ကလန်မြို့မှာ နေပါတယ်။ နယူးဇီလန်နိုင်ငံမှာ ကြိုးမဲ့ အင်တာနက် ဆက်သွယ်ရေး ၀န်ဆောင်မှုပေးတဲ့ Wireless Nation ကုမ္ဗဏီရဲ့တည်ထောင်သူနဲ့ နည်းပညာပိုင်းဆိုင်ရာ ဒါရိုက်တာ ဖြစ်ပါတယ်။

အစ်ကို ငယ်ငယ်က အကြောင်းနဲ့ ဘယ်လိုလုပ်ပြီး ကိုယ့်ကိုယ်ကို လိင်တူချစ်သူတစ်ယောက်ဖြစ်မှန်း သိခဲ့တာလဲဆိုတာကို ပြောပါဦး။
ကျွန်တော်က ဘာသာမတူတဲ့ မိဘနှစ်ပါးရဲ့ ပြုစုပျိုးထောင်မှုအောက်မှာ ကြီးပြင်းလာခဲ့တာပါ။ ကျွန်တော့် အမေက ဗုဒ္ဒဘာသာ ကိုးကွယ်ပြီး အဖေက ကက်သလစ် ဘာသာဝင်ပါ။ အဖေနဲ့ အမေ နှစ်ယောက်လုံးက ဘာသာတရား ကိုင်းရိုင်းကြပေမယ့် လိင်တူချစ်သူတွေကို နှိမ်ချဆက်ဆံတာမျိုးတော့ မတွေ့ဘူးခဲ့ပါဘူး။ ကျွန်တော် ငယ်ငယ်ကတည်းက ကစားရင် မိန်းကလေးတွေ ကစားတဲ့ အရုပ်တွေ၊ အိုးခွက်တွေနဲ့ ကစားရတာကို ပိုသဘောကျပါတယ်။ ကစားရင်လည်း မိန်းကလေးတွေနဲ့ပဲ ကစားဖြစ်တယ်။ ငယ်ငယ်ကဆိုရင် ရွယ်တူ ယောကျ်ားလေးတွေကို ကြမ်းကြမ်းတမ်တမ်း ကစားတတ်တယ်။ ရိုင်းလည်း ရိုင်းပြီး ညစ်ပေအောင် ကစားကြလို့ သိပ်သဘောမကျဘူး။

ကျွန်တော် ဆယ်ကျော်သက်အရွယ်လောက်မှာ ယောကျ်ားလေးတွေကို စိတ်ဝင်စားလာတာကို သတိထားမိတယ်။ ဆန့်ကျင်ဘက်လိင် မိန်းကလေးတွေနဲ့ အိပ်ရာထဲမှာ အတူတူနေရတာမျိုးကို လုံးဝ စိတ်ကူးလို့ မရခခဲ့ဘူး။ နောက်တော့ ကိုယ့်ကိုယ်ကို လိင်တူချင်းပဲ စိတ်ဝင်စားတဲ့သူဆိုတာ နားလည်လာတယ်။

မြန်မာနိုင်ငံမှာ လိင်တူချစ်သူတစ်ယောက်အနေနဲ့ ရှင်သန် ကြီးပျင်းခဲ့ရတဲ့အတွက် အစ်ကို့ဘဝမှာ စိတ်ထိခိုက်စရာ အတွေ့အကြုံတွေ ရှိခဲ့ဘူးလား။

ကျွန်တော် ငယ်ငယ်က အိမ်နီးနား ပတ်ဝန်းကျင်မှာကော ကျောင်းမှာပါ ခပ်ဆိုးဆိုး ယောက်ျားလေးတွေက သူတို့လို ကျားကျားလျားလျားပုံစံ မဟုတ်လို့ဆိုပြီး ၀ိုင်းစတာ ခံရတယ်။ အဲဒါ ကျွန်တော့်အသက် (၁၃) နှစ်လောက်အထိပဲ။

စိတ်ထိခိုက်စရာဆိုလို့ ကျွန်တော် (၆) တန်းကျောင်းသား အရွယ်လောက်မှာ ယောက်ျားလေးလို ကျားကျားလျားလျား မနေလို့ ဆိုပြီး ဆရာမ တစ်ယောက်က ဒဏ်ပေးတဲ့အနေနဲ့ ၀တ်ထားတဲ့ ပုဆိုးကို အတင်းချွတ်ခိုင်းတာတော့ ကြုံဖူးတယ်။ အဲဒီဖြစ်ရပ်ကြောင့် ကျွန်တော် တော်တော်လေး တုန်လှုပ်ပြီး စိတ်ထိခိုက်သွားခဲ့တယ်။ ဒါပေမယ့် အခြားဆရာမတွေက အဲဒီလိုလုပ်တာ သိသိချင်း ၀င်ပြောပြီး နောက်ကို ဒီလို မလုပ်ဖို့ အဲဒီဆရာမကို သတိပေးခဲ့ပါတယ်။

လိင်တူချစ်သူ တစ်ယောက်အနေနဲ့ မြန်မာ့ယဉ်ကျေးမှုနဲ့ ရိုးရာအစဉ်အလာ တန်ဖိုးထားမှုတွေက အစ်ကို့အပေါ် ဘယ်လောက် သက်ရောက်မှု ရှိခဲ့သလဲ။

မြန်မာ့ယဉ်ကျေးမှုဟာ ဗုဒ္ဓဘာသာအပေါ်မှာ အများကြီး အခြေခံပါတယ်။ ဗုဒ္ဓဘာသာဆိုတာ ငြိမ်းချမ်းခြင်း၊ လက်ခံခြင်းနဲ့ သည်းခံခြင်း စတဲ့ တရားတွေကို အားပေးပါတယ်။ ကျွန်တော့်အနေနဲ့ မြန်မာနိုင်ငံမှာ လိင်တူချစ်သူတစ်ယောက်အနေနဲ့ ကြီးပြင်းခဲ့ရာမှာ ဖယ်ကျဉ်ခံထားရတယ်လို့ မခံစားခဲ့ရပါဘူး။ ကျွန်တော်တို့မိသားစုရဲ့ မိတ်ဆွေတွေထဲမှာဆိုရင် ဘာသာလူမျိုး မတူတဲ့ လူတွေအပြင် လိင်စိတ်ခံယူမှု မတူတဲ့သူတွေလည်း ပါပါတယ်။ ကျွန်တော့်အမေရဲ့ ရင်းနှီးတဲ့ မိတ်ဆွေတွေထဲမှာ အတူတူနေတဲ့ အမျိုးသမီးချင်းချစ်သူ Lesbian စုံတွဲ တစ်တွဲလည်း ပါပါတယ်။ သူတို့စုံတွဲဆီကို ကျွန်တော်နဲ့ ကျွန်တော့်အမေ အတူသွားလည်နေကြပါ။

အစ်ကို နယူးဇီလန်နိုင်ငံကို ပြောင်းရွှေ့နေထိုင်ဖြစ်ခဲ့ပုံကိုလည်း ပြောပြပါဦး။

ကျွန်တော် ၂၀၀၁ ခုနှစ်မှာ ထိုင်းနိုင်ငံကနေ ကျောင်းပြီးတော့ နယူးဇီလန်၊ အော့ကလန်တက္ကသိုလ်မှာ အင်ဂျင်နီယာ ပညာရပ်အတွက် မဟာဘွဲ့ ဆက်တက်ခွင့်ရခဲ့ပါတယ်။ ကျောင်းလခအတွက် အဲဒီအချိန်က ကုလသမဂ္ဂ အဖွဲ့အစည်းတစ်ခုမှာ အလုပ်လုပ်နေတဲ့ ကျွန်တော့်အဒေါ်က ငွေချေးခဲ့ပါတယ်။ နောက် သြစတြေးလျမှာနေတဲ့ ကျွန်တော့် ဦးလေးက လေယာဉ်လက်မှတ် ၀ယ်ပေးခဲ့တယ်။ အော့ကလန်ကို ရောက်ရောက်ချင်း နေထိုင်စားသောက်စရိတ်အတွက် လန်ဒန်မှာ အခြေစိုက်တဲ့ Prospect Burma အဖွဲ့ဆီက စကောလားရှစ် ရခဲ့ပါတယ်။ အဲဒီအချိန်တုန်းက မြန်မာနိုင်ငံမှာ ကွန်ပြူတာ အင်ဂျင်နီယာ နည်းပညာနဲ့ ဘွဲ့ရတဲ့ ကျောင်းသားတစ်ယောက်အတွက် အလုပ်အကိုင် အခွင့်အလမ်းက မရှိသလောက် နည်းပါတယ်။ ဒါနဲ့ ကျောင်းပြီးတော့ နယူးဇီလန်နိုင်ငံမှာပဲ အလုပ်အကိုင်ရှာတဲ့ ၀က်ဆိုဒ်မှာ ကျွန်တော့် CV တင်ကြည့်လိုက်တယ်။ အဲဒီနောက် ခေါ်တဲ့ အလုပ်အင်တာဗျူးတွေ သွားဖြေပြီးတဲ့နောက် တစ်လလောက်အတွင်းမှာပဲ အချိန်ပြည့် အလုပ်တစ်ခုအတွက် job offer ရခဲ့ပါတယ်။ ပြောရမယ်ဆိုရင်တော့ အဲဒီအချိန်က ကျွန်တော့်အသက်အရွယ် ငယ်သေးတာရယ်၊ ကျွန်တော့်ပညာအရည်အချင်းကြောင့်ရယ်၊ ဒီနိုင်ငံမှာ လိုအပ်ချက်ရှိတဲ့ အလုပ်အကိုင်အမျိုးအစား ဖြစ်တာကြောင့်ရယ်၊ နောက်ပြီး အဲဒီအချိန်က နယူးဇီလန်နိုင်ငံရဲ့လူဝင်မှု ဥပဒေတွေက သိပ်ပြီး မတင်းကြပ်သေးတာရယ်၊ အဲဒီအကြောင်းတွေကြောင့် မကြာခင်မှာ ကျွန်တော် အမြဲတန်း နေထိုင်ခွင့် PR ရခဲ့ပါတယ်။ ဒီကို ရောက်ပြီး သုံးနှစ်အတွင်း နယူးဇီလန် နိုင်ငံသား ဖြစ်လာခဲ့ပါတယ်။

ကျွန်တော့်ကုမ္ဗဏီ အောင်မြင်လာတာကတော့ အတူအလုပ်လုပ်နေတဲ့ ၀န်ထမ်းအားလုံးမှာ တူညီတဲ့ ဦးတည်ချက်ရှိပြီး သူတို့ နေ့စဉ်လုပ်နေတာအပေါ် စိတ်နှစ်မြုပ်ပြီး ကြိုးစားလုပ်ကိုင်နေကြလို့ပါ 

နယူးဇီလန်ကို ရောက်ပြီး မကြာခင်မှာ ပဲ ကိုယ်ပိုင်လုပ်ငန်း တည်ထောင်ပြီး အောင်မြင်တဲ့ လုပ်ငန်းရှင်တစ်ယောက် ဖြစ်လာအောင် ဘယ်လို ကြိုးစားခဲ့ရသလဲ ဆိုတာကိုလဲ ပြောပြပါဦး။

ပြည်သူတွေ မြန်နှုန်းမြင့် အင်တာနက် သုံးနိုင်ဖို့ဆိုရင် ကြိုးမဲ့ အင်တာနက်နည်းပညာနဲ့ ချိတ်ဆက်တာဟာ အမြန်ဆန်ဆုံးနဲ့ စရိတ်လည်း အသက်သာဆုံးဖြစ်တယ်လို့ ကျွန်တော်က စွဲစွဲမြဲမြဲ ယုံကြည်ပါတယ်။ ဒါကြောင့် အင်ဂျင်နီယာ ကုမ္ဗဏီတစ်ခုမှာ သုံးနှစ်ကြာ အလုပ်လုပ်ပြီး နယူးဇီလန်နိုင်ငံသား ဖြစ်လာပြီးတဲ့နောက် ကြိုးမဲ့ အင်တာနက် ဆားဗစ်အတွက် ၀န်ဆောင်မှုပေးတဲ့ ကုမ္ဗဏီတစ်ခု တည်ထောင်ဖို့အတွက် အလုပ်ကနေ ထွက်လိုက်ပါတယ်။ နယူးဇီလန်နိုင်ငံရဲ့ ကျေးလက်နဲ့ မြို့ပြဒေသတွေအကြားမှာ ဒစ်ဂျစ်တယ်နည်းပညာအရ ကွာဟချက် ကြီးကြီးမားမား ရှိနေတာကို ကြိုးမဲ့ အင်တာနက် နည်းပညာကို အသုံးပြုပြီး ကျဉ်းမြောင်းအောင် လုပ်ပေးဖို့ ဆုံးဖြတ်ခဲ့ပါတယ်။ အဲဒီအချိန်က နယူးဇီလန်ကျေးလက်မှာ အခြေစိုက်ပြီး စီးပွားရေးလုပ်နေတဲ့ လိင်တူချစ်သူ စုံတွဲတစ်တွဲနဲ့ သိကျွမ်းခဲ့ပါတယ်။ သူတို့နေထိုင်တဲ့ ကျေးလက်ဒေသတွေမှာ ဒေသတွင်း တယ်လီဖုန်း အိတ်ချိန်းတွေနဲ့ အလှမ်းဝေးတဲ့အတွက် မြန်နှုန်းမြင့် အင်တာနက်ကို ဖုန်းလိုင်းကနေတဆင့် ချိတ်ဆက်ဖို့ မဖြစ်နိုင်သလောက် ခက်ခဲနေတာ သိခဲ့ရတယ်။ သူတို့ကနေတဆင့် အဲဒီဒေသက ကျေးလက် စီးပွားရေးလုပ်ငန်းရှင်တွေဖွဲ့ထားတဲ့ အဖွဲ့နဲ့ တွေ့ဆုံခွင့်ရခဲ့တယ်။ အဲဒီမှာ ကျွန်တော်က အင်တာနက်ကို ဖုန်းလိုင်းကနေတဆင့် ချိတ်ဆက်မယ့်အစား ကြိုးမဲ့ အင်တာနက်နည်းပညာနဲ့ ဂြိုဟ်တုကနေတဆင့် ချိတ်ဆက်တဲ့ နည်းပညာကို သူတို့ကို လက်တွေ့သရုပ်ပြခွင့်ရခဲ့ပါတယ်။ အဲဒီနောက် သူတို့က အရမ်းပဲ သဘောကျပြီး လုပ်ငန်းစတင်တည်ထောင်ဖို့ ရန်ပုံငွေ ဒေါ်လာ (၂) သန်းနီးပါး ရရှိခဲ့ပါတယ်။ အဲဒီလိုနဲ့ ကြိုးမဲ့နည်းပညာသုံးပြီး ဂြိုဟ်တုကတဆင့် နယူးဇီလန် တစ်နိုင်ငံလုံးကို အင်တာနက်ဝန်ဆောင်မှုပေးတဲ့ Internet Service Provider အဖြစ် လုပ်ငန်းစတင်ခဲ့တာပါ။

ကျွန်တော့်ကုမ္ဗဏီ အောင်မြင်လာတာကတော့ အတူအလုပ်လုပ်နေတဲ့ ၀န်ထမ်းအားလုံးမှာ တူညီတဲ့ ဦးတည်ချက်ရှိပြီး သူတို့ နေ့စဉ်လုပ်နေတာအပေါ် စိတ်နှစ်မြုပ်ပြီး ကြိုးစားလုပ်ကိုင်နေကြလို့ပါ။ ကုမ္ဗဏီဝန်ထမ်းတွေအပေါ်မှာ သူတို့ရဲ့ အလုပ်ရှင် တစ်ယောက်အနေနဲ့မဟုတ်ဘဲ သူတို့ရဲ့ မိတ်တွေ၊ သူတို့ကို ကူညီအားပေးမယ့်သူ ပုံစံမျိုးဖြစ်အောင် ကြိုးစားပါတယ်။ ကျွန်တော့်ကုမ္ဗဏီအနေနဲ့ ယုံကြည်မှု၊ စိတ်နှစ်မြုပ်လုပ်ကိုင်မှု၊ ဆက်သွယ်ပြောဆိုခြင်းနဲ့ တစ်စိတ်တစ်ဝမ်းတည်း လုပ်ကိုင်ခြင်းစတဲ့ တန်ဖိုးတွေကို ဆောင်ပုဒ်အဖြစ် လက်ကိုင်ထားပါတယ်။

လိင်တူချစ်သူတစ်ယောက်ဖြစ်တဲ့အတွက် အစ်ကို့ရဲ့ အလုပ်အကိုင်ကို ထိခိုက်တာမျိုး ကြုံဖူးပါသလား။ ဥပမာ ကိုယ် လိင်တူချစ်သူဖြစ်မှန်း သိသွားတဲ့အခါ ကိုယ်ရာထူးတိုးဖို့ မတိုးတော့ပဲ အခြားတစ်ယောက်ကို တိုးပေးလိုက်တာမျိုးပေါ့။

ကျွန်တော့်အနေနဲ့ ဒီနိုင်ငံမှာတော့ လုပ်ငန်းခွင်မှာရော၊ ပညာသင်ကြားတဲ့ နေရာမှာကော လိင်စိတ်ခံယူမှုကွဲပြားလို့ ခွဲခြား ဆက်ဆံခံရတာမျိုး မကြုံဘူးသေးပါဘူး။ ကျွန်တော် တက္ကသိုလ်ကနေ ဘွဲ့ရပြီးတော့ လျှပ်စစ်ပိုင်းဆိုင်ရာ ကျွမ်းကျင်ပညာရှင်အဖြစ် အလုပ်ရခဲ့ပါတယ်။ ကျွန်တော်နဲ့အတူ အလုပ်လုပ်ရတဲ့အဖွဲ့မှာ ကျွန်တော်တစ်ယောက်ပဲ ဂေးဖြစ်ပြီး၊ ကျန်တဲ့သူတွေက straight တွေပါ။ အားလုံးက ကျွန်တော့်ကို လေးစားမှုနဲ့ ဆက်ဆံကြပါတယ်။ နောက်ပြီး ကျွန်တော် ကိုယ်ပိုင်လုပ်ငန်း တည်ထောင်ဖို့ အဲဒီကုမ္ဗဏီကနေထွက်ဖို့လုပ်တော့ ပိုင်ရှင်က အလုပ်ကမထွက်ပဲ သူ့ရာထူးကို ယူဖို့တောင် ပြောခဲ့ဘူးပါတယ်။ ကျွန်တော်နဲ့ date နေတဲ့သူကို ကုမ္ဗဏီရဲ့နှစ်ပတ်လည် အခမ်းအနားတွေကို ခေါ်သွားပါတယ်။ အားလုံးကလည်း လက်ခံကြပါတယ်။

                                                    ကိုကျော်ဇင်လင်းနှင့် သူ၏အမျိုးသားဖြစ်သူ Andreas Derleth

ကျွန်တော်တို့ တစ်ယောက်ကို တစ်ယောက် လေးစားမှုနဲ့ ယုံကြည်မှုအပြည့်အဝ ရှိကြပါတယ်။ ဒါဟာ ပျော်ရွှင်စရာကောင်းတဲ့ ဆက်ဆံရေးဖြစ်ဖို့ အဓိကလိုအပ်ချက် ဖြစ်ပါတယ်

အစ်ကို့ရဲ့အချစ်ရေးနဲ့ လက်ရှိ အိမ်ထောင်ဖက်အကြောင်းကိုရော ပြောပြပါဦး။ ဘယ်လို တွေ့ဆုံပြီး ချစ်ကြိုက်ခဲ့တာလဲ ဆိုတာကိုပေါ့။

အစက သူနဲ့ ကျွန်တော်နဲ့ တိုက်ခန်းတစ်ခုမှာ အခန်းဖော်အဖြစ် အတူနေကြပါတယ်။ အဲဒီနောက် ချစ်သူတွေဖြစ်သွားကြပြီး ၂၀၁၁ ခုနှစ်မှာ Civil Union လို့ခေါ်တဲ့ ကတိသစ္စာပြုပေါင်းဖက်ခြင်း လုပ်ခဲ့ကြပါတယ်။ ကျွန်တော်တို့ တစ်ယောက်ကို တစ်ယောက် လေးစားမှုနဲ့ ယုံကြည်မှုအပြည့်အဝ ရှိကြပါတယ်။ ဒါဟာ ပျော်ရွှင်စရာကောင်းတဲ့ ဆက်ဆံရေးဖြစ်ဖို့ အဓိကလိုအပ်ချက် ဖြစ်ပါတယ်။ ကိုယ်ဝါသနာပါတဲ့ အရာတွေကို အတူတူကော၊ သီးခြားစီကော လုပ်ကြပါတယ်။ ဥပမာ ပြောရရင် ကျွန်တော်တို့ နှစ်ယောက်လုံး ရုပ်ရှင်ကြည့်ရတာတို့၊ အပြင်ထွက်ပြီး ညစာစားကြတာတို့ လုပ်ရတာ ကြိုက်ပါတယ်။ ကျွန်တော့်အမျိုးသားက စွန့်စွန့်စားစား ခရီးသွားရတာ ၀ါသနာပါပြီး သူတစ်ယောက်တည်း သွားတတ်ပါတယ်။ (မှတ်ချက် နယူးဇီလန်နိုင်ငံမှာ ၂၀၁၃ ခုနှစ်မှသာ လိင်တူချင်း လက်ထပ် ထိမ်းမြှားမှုကို တရားဝင် ခွင့်ပြုခဲ့ပါတယ်။)

လက်ရှိ မြန်မာနိုင်ငံမှာ လိင်တူချင်း လက်ထပ်တာ တရားမဝင်တဲ့အတွက် LGBT (လိင်တူချစ်သူ) တွေ ကိုုယ်တိုုင်အပါအဝင် လိင်တူချင်း ချစ်ကြိုက်တာကို ဘယ်သူကမှ တန်ဖိုးမထားကြဘူး ဖြစ်နေပါတယ်။ အခု LGBT (လိင်တူချင်းချစ်သူတွေ) အသိုင်းအဝိုင်းထဲမှာဆိုရင် လူငယ်အချို့က အချစ်ရေးကို မယုံကြည်တော့ဘဲ အလုပ်နဲ့ ပညာရေးကိုပဲ ဖိပြီး လုပ်တတ်ကြတယ်။ အချို့ကျတော့လည်း အချစ်ရေး ကိစ္စနောက်ကိုပဲ အလွန်အကျွံလိုက်ပြီး ပညာရေးနဲ့ အလုပ်မှာ လစ်ဟင်းသွားတယ်။ အစ်ကို့အနေနဲ့ကော အောင်မြင်တဲ့ လိင်တူချစ်သူတစ်ဦးအနေနဲ့ အချစ်ရေးနဲ့ အလုပ်အကိုင်ကို ဘယ်လို ဟန်ချက်ညီအောင် ထိန်းညှိသလဲ။

ကျွန်တော့်အနေနဲ့ အလွန်အကျွံ အလုပ်မလုပ်မိဖို့ ထိန်းပါတယ်။ ကျန်းမာအောင် နေထိုင်ပါတယ်။ ကျန်းမာဖို့စားတဲ့ အစားအသောက်ကို ဂရုစိုက်ရွေးပြီး စားပါတယ်။ အိမ်ထောင်ရေးမှာဆိုရင် တစ်ယောက်အပေါ်တစ်ယောက် သဝန်တိုစိတ်မထားပဲ လွတ်လပ်ခွင့်ပေးပါတယ်။ တစ်ယောက်က လိုအပ်တဲ့အချိန်မှာ တစ်ယောက်က တတ်နိုင်သလောက် ကူညီပေးနိုင်ဖို့ ပြင်ဆင်ထားပါတယ်။ ဒီလောက်ပါပဲ။

အခြား ကမ္ဘာ့နိုင်ငံတွေနဲ့ယှဉ်ရင် လက်ရှိ မြန်မာနိုင်မှာ LGBTတွေရဲ့အခွင့်အရေး အခြေအနေကို ဘယ်လို မြင်ပါသလဲ။

ကျွန်တော့်အမြင်အရတော့ မြန်မာနိုင်ငံရဲ့ စီးပွားရေးအခြေအနေနဲ့ လူမှုရေးအရ တိုးတက်မှုတွေအရ အဆင့်အတူတူလောက်ရှိတဲ့ အခြားနိုင်ငံတွေနဲ့ ယှဉ်လိုက်ရင် မြန်မာနိုင်ငံမှာ LGBT တွေကို အများကြီး လက်ခံပေးပါတယ်။ လိင်တူချင်း ချစ်ကြိုက်တာကို ရာဇဝတ်မှုဖြစ်အောင် လုပ်ထားတဲ့ ဥပဒေတွေကို အမြန်ဆုံး ပြင်ဆင်ဖို့ လိုပါတယ်။ ဒီဥပဒေတွေက ကိုလိုနီခေတ်ကတည်းက ရှိခဲ့တာဖြစ်တဲ့အပြင် သြစတြေးလျနဲ့ နယူးဇီလန်လို အရင်ဗြိတိသျှ ကိုလိုနီနိုင်ငံတွေမှာ ဒီဥပဒေတွေကို ပယ်ဖျက်ခဲ့ပြီးတာ ကြာလှပါတယ်။ ဒါ့အပြင် ငြိမ်းချမ်းခြင်းနဲ့ သည်းခံခြင်းကို အားပေးတဲ့ မြန်မာ့ယဉ်ကျေးမှုနဲ့လည်း ဆန့်ကျင်ရာရောက်ပါတယ်။
မြန်မာနိုင်ငံအနေနဲ့ LGBT အခွင့်အရေးအပါအဝင် လူ့အခွင့်အရေးကိစ္စတွေမှာ နယူးဇီလန်နိုင်ငံရဲ့ လုပ်ဆောင်ချက်တွေကို နမူနာယူနိုင်မယ်လို့ ထင်ပါတယ်။

လက်ရှိ အစိုးရအနေနဲ့ကော လိင်တူချစ်သူတွေရဲ့ အခွင့်အရေးအခြေအနေ တိုးတက်လာဖို့ ဘယ်လောက် ထိထိရောက်ရောက် လုပ်ပေးခဲ့တယ်လို့ ထင်ပါသလဲ။ ဘာတွေ ဆက်လုပ်ပေးသင့်တယ်လို့ မြင်ပါသလဲ။

ကျွန်တော်က ၁၉၈၈ ခုနှစ်ကတည်းက မြန်မာနိုင်ငံ ပြင်ပမှာ နေထိုင်လာခဲ့တာပါ။ အခုအချိန်မှာ အဲဒီကိစ္စနဲ့ ပက်သက်လို့ လုံလုံလောက်လာက် မသိတဲ့အတွက် ဘာမှ မှတ်ချက်မပေးလိုပါဘူး။

အခုလို မြန်မာလူမျိုး လိင်တူချင်းချစ်သူ တစ်ဦးလည်းဖြစ်၊ အောင်မြင်တဲ့ လုပ်ငန်းရှင်လည်းဖြစ်တဲ့ အစ်ကို့အနေနဲ့ မြန်မာနိုင်ငံက လိင်တူချစ်သူ လူငယ်တွေကို ဘယ်လို သတင်းစကားမျိုး ပါးချင်ပါသလဲ။

ကျွန်တော် ပြောချင်တာကတော့ “Never give in, never give up, never forget your root” ဆိုတာပါပဲ။ ဘယ်တော့မှ လက်နက်မချနဲ့၊ အရှံးမပေးပါနဲ့၊ ကိုယ်ဘယ်က လာလဲ ဆိုတာလည်း မမေ့နဲ့ပေါ့။ နောက်ပြီး သူများအပေါ်မှာ သနားကြင်နာပြီး၊ လေးလေးစားစား ဆက်ဆံပါ။ ကိုယ့်အလုပ်ကို ကိုယ် အောင်မြင်အောင် လုပ်ပါ။ ကျွန်တော်တို့ အားလုံးဟာ တစ်ယောက်နဲ့တစ်ယောက် မတူညီနိုင်တဲ့အတွက် အရာရာကို သူများတွေနဲ့လိုက်ပြီး မနှိုင်းယှဉ်ပါနဲ့။ ဒါလောက်ပါပဲ။

ဟုတ်ကဲ့။ အခုလို မအားလပ်တဲ့ကြားက ဖြေကြားပေးတဲ့အတွက် ကျေးဇူးတင်ပါတယ်။

 

နေရောင်လင်းခန့်
စီစဉ်တင်ဆက်သည်

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.